نصائح قبل شراء سيارة في تونس

توه تقريبا أغلب السيارات المطلوبين عند المواطن هوما

clio و polo و opel و volksvagen بصفه عامة و شوية citrowen و kia و ford

نصيحة ليك يا مواطن اذا انت ماكش مهف اخسر هز معاك ميكانيكي و طوليي تطلع رابح ماكش خاسر.. و انت زادة لازمك تكون فايق باش حتى هوما ما يقلبوش عليك الطاولة كيف يحسوك دغفة

أولا تشوف الكرهبة بأسم صاحبها أو لا ، اذا بتوكيل اجبد روحك خاطر الڨشارة و السمسارة بصفة عامة يشرو كان التاعب و بعد يخسرو عليها غسلة و تنظيفة للصالة و يغسلك الموطور و يقلك نظيفة… تأكد أي واحد ڨشار مايعطيكش الصحيح ، و حتى تبدا الكرهبة بأسمو تأكد أقل حاجة لازم يكون كاسبها عامين فما فوق وربي تسلك ثمة ناس يقلك عام باهي.. انا نقلهم توه الڨشار ما يوصل يبيع كرهبة الا ما تبقى من شهرين للعام و هو يدلل عليها لين يطيح بواحد دغفةً ، هاكة علاش الڨشارة ولاو ياخذو اكثر من قطعة

ثانيا تتفقد الطولة بالباهي فيهاش ماستيك و تتفقد السقف تطلعش مقلوبة

ثالثا تتفقد موطور.. لازمك تخدم الكرهبة تخرج بيها و تجري بيها توصلها حتى 110 و تمشي بيها أقل حاجة 20 كلم، تحبسها وتحل الكابوط اذا موطور يبوخ أو يرنفل اجبد روحك، و اذا الكرهبة ماجاوبتش في الطريق اعرف راهو مطورها تاعب و صابلها زيت 90 باش ماترنفلش،

ايه و ثمة نصيحة اخرى.. ساعات تطيح بواحد جايب كرهبة مسخة بكلها غبرة زعمة زعمة هوكا بطبيعتها بلاش تروشيك وتزييف…الخ هذاكا قلو أعمللها لفاج قدامي خاطر بعد لفاج ماهيش باش تخدم خاطر عندها مشكلة في كاربيراتور او الانجاكسيون يدخلو الماء و ما تخدم كان ماتشيح في شمس و المشكل هذا تلقاه في بيجو 206 و

passat b5 w 6 w 7

حقة.. و انت تجرب فيها وصلها لل 90 وسيب يدك على فولون 3 ثواني اذا هربت يمين أو يسار اعرف راهو climayeur بالع أو الكرهبة عاملة حادث… اذا قالك راهو حكاية فارغو و أمشي أعمل parallélisme قلو يفتح الله ايه وبالنسبة للدخان اذا لقيتو اسود راهو مايخوفش اذا أبيض اعرف راهو على ابواب بيالة و أخيرا ان شاء الله ربي يبعد عليكم ولاد الحرام ويطيح بيكم ولاد الحلال..